Mie Baptist Church Tuanbia Tawi
A. Khrihfabu thawhkehnak
Kum 2009 ah Dallas-Fort Worth (minung 8 million umnak khuapi –Kawlmi 6000-7000 umnak) ummi Mie hi naihniam deuh in hawikomhnak an ngeih khawhnak dingah meeting tuah in, a tanglei bantukin timhlamhnak an rak ngei. 1) DFW chung um Mie Hawikomhnak ngeihnak 2) Kaltaakmi Lailei Mie bawmhchanhnak 3) A herh tuk dirhmun a phanh ahcun Khrihfabu zong dirh khawhnak Mie Khrihfabu an dirhnak a ruang cu a cunglei tinhmi pathum cungah aa hngat. Cun Mie fanau hi Thlarau lei ah karhlan khawhnak ding le mahte zalong deuh tein Pathian thangthat pumhnak ngeih dingin biachahnak an ngeih hnu ah August 17, 2014 ah Terry Hall ah pumhnak a hmaisabik kan rak ngei. A voi khatnak minung 18; a voihnihnak pumh ah minung 48 tiin thawk a si. A tanglei bantukin hruaitu upa zong an rak ithim. 1) Hrangbik Sangte Hotu 2) Hrawng Nawn Hotu bawmtu 3) Kap Cung Lian Chungtuan 4) Van Cin Thang Chungtuan bawmtu 5) Hram Zel Ngunkeng 6) Hniar Bik Ngunkeng bawmtu 7) Tial Vung 8) Ngun Uk 9) Bawi Thang 10) Ngun Hre 11) Biak Hram 12) Myinhre Sianguk September 7, 2014 ah Rev Dr Chum Awk sawm in Pathian sin thluachuah a hal piak hnu ah hlan Miemitam deuh rak umnak Khrihfabu Bethel Baptist Church sinah thluachuah an hal hna i, December 28,2014 ah an senior Rev. Khen Sang nih tangka $10000 (thonghra) he thluachuah a pek hna. B. Min Kong 2014, August 30 tonnak ah MIE CHRISTIAN CHURCH tiah ti a si hmaisa nain, bu min (denomination) a tel lo ahcun hmailei Khrihfabu hruainak a tlamtling deuh lo caah a voi nga nak meeting 2014 September 14 ah MIE BAPTIST CHURCH tiah an thlen than hnu ah 501C3 zong hi min hin tuah a si. C. Pehtlaihnak le Pastor CBCUSA, an umnak county Denton Baptist Association le Baptist General Convention of Texas (Texas Baptists) ah pehtlaihnak an tuah. Cun Lailei ummi Mie Area Baptist Churches he ihruainak ihrawm khawh a si lo caah a lang member in pehtlainak an ngei. A voi ruknak meeting an ngeihnak ah Pastor ngeih khawh venak an ceih i, Lailei in Rev. Tha Cung Nung cu sianginn kai ding US ah a timh caah visa hmuh le hmuh lo a fiang lo nain amah hngah siseh tiah biachahnak an tuah. July 25, 2015 ah Dallas a phan i, August 1 in Pastor ah an lak. D. chungtel umtu ning Kum 2014 kum dih min cazin hi felfai deuh in a um lo caah kum 2015 kum dih hnu cazin ningin kan langhter. 2015 Milu 269; 2016 milu 312; 2017 milu 366; 2018 milu 357; 2019 milu 383; 2020 milu 376; 2021 milu 412 le 2022 milu 444 tiin chungtel umtuning cu a si. US ram cu state pakhat le pakhat ithial a fawi tuk caah le mah le riantuan duhmi hoih in minung an ithial lengmang caah chungtel tum le kai a tam ngai. E. Biakinn cawknak Kum 2015 in biakinn ngeih khawhnak caah timhlamhnak an thawk i, 2020 a dih ah cawk dingin an thlacamnak a rak si. Bawipa zaangfahnak thawng January 31, 2020 ah sqf 27000 a nganmi biakinn cu $2145,000 in an cawk. A hmun hi 2.99 acres a kau. Pathian thangthatnak (sanctuary), lentecelhnak (gym) zungkhan le Sunday school class tampi, coka, tikholhnak le motor parking 170 aa telmi a si. A hlei in Mie unau dihlak caah headquarters a si lai. F. Biadonghnak Mi tampi nih pengtlang min rumro bunh in ramri a ngei lomi thlarau riantuannak ca hman cu aa dawh deuh lo a timi zong an um len. Hihi mi zawnruah lo le politic Khrihfabu a si caah, a si awk a si lo an ti. Nain, Laimi Khrihfabu chung kan thlihran a si ko. Laimi tamnak ah bu kan ithen tuk. Zapi cu umnak thitha thei lo tiang in an vaivuan. Khat ah ithial; khat ah an kal. Buainak le hnahnawhnak he riaklang va bang faivuan in an um. Cucu hruaitu mawh le tlamtlin lo ruangah a si kho. Cu thlihran nih a chawihmi ah MBC hi aa tel ve. A chiatnak lei mit in zoh ahcun a mui a chia kho men nain a thatnak lei in zoh ahcun minung sersiamnak le aa dawhmi le a thawngmi mission riantuannak a si. Khrihfabu phan loin a vaivuan sawhsawhmi Pathian lei ah thazaang an lak kho. Cun Khrihfabu chungah ramkhel bantuk thlihrang riantuannak a donghter deuh lai caah lung sivang in buaibainak a tlawm deuh. Bawipa a hnatlak ahcun hi min thawngin Pathian sunparnak a lang ve ko lai. Midang he ihlat si loin midang he ikop in Khrih mission kan thawnter deuh lai. Mi caah hnahnawhnak si loin midang thluachuah phurtu dingah Bawipa nih umpi ko seh.